მომსახურების ხელშეკრულება
ხელშეკრულების ნიმუში, რომლითაც GENX.GE ყველა პროექტს აფორმებს. კონკრეტული ფასი, ვადა და ტექნიკური დავალება თითოეული შეკვეთისთვის ცალკე ჩაიწერება.
1. მხარეები
- 1.1
შემსრულებელი: ინდივიდუალური მეწარმე უშანგი წიკლაური (GENX.GE), რეგისტრირებული საჯარო რეესტრში 28.06.2022, გადაწყვეტილება № B22080263/3.
- 1.2
შემკვეთი: ფიზიკური ან იურიდიული პირი, რომლის მონაცემებიც (სახელი / დასახელება, საიდენტიფიკაციო ნომერი, საკონტაქტო ინფორმაცია) ხელშეკრულებაში ხელმოწერისას ჩაიწერება.
2. ხელშეკრულების საგანი
- 2.1
შემსრულებელი ქმნის შემკვეთისთვის ციფრულ პროდუქტს (ვებსაიტს, აპლიკაციას, ბანერს, ლოგოს, მოდულს ან სხვა სერვისს) შეთანხმებული ტექნიკური დავალების მიხედვით.
- 2.2
ტექნიკური დავალება, ფასი და ვადები ამ ხელშეკრულების განუყოფელი ნაწილია. ნებისმიერი ცვლილება მხოლოდ ორივე მხარის წერილობითი თანხმობით ძალდება (ელფოსტით ან კაბინეტის ჩათში).
3. ვადები
- 3.1
სამუშაოს ვადა ტექნიკურ დავალებაში იწერება და იწყება ავანსის მიღების დღიდან.
- 3.2
თუ სამუშაოსთვის საჭირო მასალას (ტექსტი, ფოტო, წვდომა, დასტური) შემკვეთი აგვიანებს, ვადა იმდენი დღით გადაიწევს, რამდენიც მასალას დასჭირდა.
- 3.3
შეკვეთის მიმდინარეობა და ვადა შემკვეთის კაბინეტში ჩანს.
4. ღირებულება და გადახდა
- 4.1
ღირებულება ფიქსირებულია და ტექნიკურ დავალებაში იწერება. შეთანხმებულ ფარგლებს გარეთ დამატებითი სამუშაო ცალკე ფასდება და იწყება მხოლოდ შემკვეთის თანხმობის შემდეგ.
- 4.2
თუ სხვაგვარად არ შეთანხმდა: 50% — ავანსი სამუშაოს დაწყებამდე, 50% — ჩაბარებისას, სანამ პროდუქტი შემკვეთის სერვერზე ან ანგარიშზე გადავა.
- 4.3
გადახდა ხდება ინვოისით, რომელიც შემკვეთის კაბინეტში იხსნება.
5. ჩაბარება და შესწორებები
- 5.1
შემსრულებელი პროდუქტს შემკვეთს სატესტო მისამართზე აჩვენებს. შემკვეთს შენიშვნებისთვის აქვს 5 სამუშაო დღე.
- 5.2
ტექნიკური დავალების ფარგლებში შესწორებები უფასოა. ახალი ფუნქცია ან დიზაინის ძირეული შეცვლა ცალკე შეთანხმებით კეთდება.
- 5.3
თუ 5 სამუშაო დღეში შენიშვნა არ მოვიდა, სამუშაო ჩაბარებულად ითვლება.
6. საავტორო უფლებები
- 6.1
სრული გადახდის შემდეგ შემკვეთს გადაეცემა შექმნილი პროდუქტის კოდი, დიზაინი და მასალები და მათი გამოყენების სრული უფლება.
- 6.2
მესამე მხარის კომპონენტები (შრიფტები, ბიბლიოთეკები, ფასიანი სერვისები) თავისივე ლიცენზიით გადაეცემა.
- 6.3
შემსრულებელს შეუძლია ნამუშევარი პორტფოლიოში აჩვენოს, თუ შემკვეთი წერილობით არ მოითხოვს, რომ არ აჩვენოს.
7. დეველოპერის ნიშანი (კრედიტი)
- 7.1
შემსრულებელი საიტის ქვედა ნაწილში (ფუტერში) ათავსებს მცირე ზომის ნიშანს „შექმნილია GENX.GE-ს მიერ“ (ინგლისურ ვერსიაზე „Website by GENX.GE“) ბმულით genx.ge-ზე.
- 7.2
ნიშანი საიტის დიზაინს ერგება, არ ფარავს შემკვეთის კონტენტს და არ შეიცავს რეკლამას.
- 7.3
შემკვეთი ნიშანს არ შლის და არ ცვლის შემსრულებლის წერილობითი თანხმობის გარეშე. ნიშნის გარეშე საიტი შესაძლებელია წინასწარი შეთანხმებით, რაც ტექნიკურ დავალებაში იწერება.
8. გარანტია და მხარდაჭერა
- 8.1
ჩაბარებიდან 3 თვის განმავლობაში შემსრულებელი უფასოდ ასწორებს შეცდომებს, რომლებიც მისი სამუშაოდან მომდინარეობს.
- 8.2
გარანტია არ მოიცავს შემკვეთის ან მესამე პირის ცვლილებებით გამოწვეულ ხარვეზებს, ჰოსტინგის გაუმართაობას და მესამე მხარის სერვისების ცვლილებას.
- 8.3
გარანტიის შემდეგ მხარდაჭერა ცალკე შეთანხმებით გრძელდება.
9. კონფიდენციალურობა
- 9.1
მხარეები არ ამხელენ ერთმანეთის კომერციულ ინფორმაციას, წვდომის მონაცემებს და პერსონალურ მონაცემებს, გარდა კანონით გათვალისწინებული შემთხვევებისა.
- 9.2
სერვერის, დომენის და ანგარიშების წვდომას შემსრულებელი მხოლოდ სამუშაოსთვის იყენებს. ჩაბარების შემდეგ შემკვეთს შეუძლია პაროლები შეცვალოს.
10. ხელშეკრულების შეწყვეტა
- 10.1
ნებისმიერ მხარეს შეუძლია ხელშეკრულება წერილობითი შეტყობინებით შეწყვიტოს.
- 10.2
შეწყვეტისას შემკვეთი იხდის უკვე შესრულებული სამუშაოს ღირებულებას. ავანსის დარჩენილი ნაწილი უბრუნდება, შესრულებული სამუშაო კი შემკვეთს გადაეცემა.
11. დავები
- 11.1
დავა ჯერ მოლაპარაკებით წყდება. თუ შეთანხმება ვერ მოხერხდა, დავა საქართველოს კანონმდებლობით, საქართველოს სასამართლოში განიხილება.
12. გაფორმება
- 12.1
ხელშეკრულება ფორმდება წერილობით ან ელექტრონულად. ორივე ფორმას თანაბარი ძალა აქვს.
- 12.2
ხელშეკრულება ძალაში შედის ხელმოწერის (ან ელექტრონული დადასტურების) დღიდან და მოქმედებს ვალდებულებების სრულ შესრულებამდე.